Voyage de J. Cartier au Canada

premiers. Et fut ordonne pour le guet de la nuyt pour le temps advenir cinquante hommes a quatre quars et a chascun changement desdicts quars les trompettes sonnans ce qui fut faict selong ladicte ordonnance. Et lesdicts Donnacona Taignoagny et Dom Agaya estans advertiz dudict renffort et de la bonne garde et guet que lon faisoit furent courroucez destre en la male grace du cappitaine et envoyerent par plusieurs fois de leurs gens faignant quilz feussent dailleurs pour veoir si on leur feroit desplaisir desquelz on ne tint compte et nen fut faict ny monstre aucun semblant. Et y vindrent lesdicts Donnacona Taignoagny, Dom Agaya et aultres plusieurs fois parler audict cappitaine une riviere entre d'eulx, demandant audict cappitaine sil estoit marry et pourquoy il nalloit a Canada les veoir. Et ledict cappitaine leur respondit quilz nestoient que traitres et meschans ainsi que on luy avoit rapporte, et aussi quil avoit apperceu en plusieurs sortes comme de navoir tins promesse de aller a Hochelaga et de avoir retire la fille que on luy avoit donnee, et aultres mauvais tours quil leur nomma ; mais pour tout ce que silz voulloient estre gens de bien et oublyer leur malle volunte, quil leur pardonnoit et quilz vinssent seurement a bort faire bonne chere comme pardevant. Desquelles parolles remercierent ledict cappitaine et luy promisrent quilz luy rendroient la fille qui sen estoit fuye, dedans trois jours. Et le quatriesme jour de novembre Dom Agaia accompaigne de six aultres dict cappitaine que le seigneur Donnacona estoit alle par le pays sercher ladicte fille et que le lendemain elle luy seroit par luy amenee.
    Et oultre dit que Taignoagny estoit fort malade et quil prioit le cappitaine lui envoyer ung peu de sel et de pain, ce que fist ledict cappitaine, lequel luy manda que cestoit Jhesu qui estoit marry contre luy pour les maulvais tours quil avoit cuyde jouer.
Et le lendemain ledict Donnacona, Taignoagny, Dom Agaya et plusieurs aultres vindrent et amenerent ladicte fille, la representant audict cappitaine lequel nen tint compte et dit quil nen voulloit point et qu'ils la remmenassent. A quoy respondirent faisant leur excuse quilz ne luy avoient pas conseille sen aller ains quelle sen estoit allee parce que les paiges lavoient battue ainsi quelle leur avoit dict, et prioient de rechief le cappitaine de la reprendre, et eulx mesmes la menerent jusques au navire. Apres lesquelles choses le cappitaine commanda apporter pain et vin et les festoya, puis prindrent conge les ungs des aultres. Et despuis sont allez et venuz a noz navires et nous a leur demourance en aussi grand amour que pardevant.